Protesta, Rama: Mandatet e PS-së nuk digjen

ELBASAN- Sonte, qytetarët elbasanas janë mbledhur në shesh për hapjen e kutive të votimit, në mitingun protestues të opozitës për zbardhjen e zgjedhjeve. Qindra mijëra vetë kanë kërkuar hapjen e kutive për të larguar nga pushteti Sali Berishën. Rama i garantoi socialistët se mandatet e PS-së në Kuvend nuk digjen sepse janë fituar nga qytetarët për të mposhtur zgjedhën e pushtetit familjar.


Në fjalën e tij, lideri i PS-së, Edi Rama është shprehur se pushteti familjar gjakosi gazetarin Mero Baze. "Një gazetar i padëshirueshëm nga Berisha u gjakos nga një biznesmen i familjes. Ai përmes mbrojtjes së paligjshme nuk paguan taksa sepse këtu funksionon shtetit kanunor dhe jo shteti ligjor", u shpreh ai.


Sipas Ramës, në Shqipëri funksionon shtetit kanunor që është vënë në shërbim të familjes. "Ky pushtet e ka kthyer shtetin e së drejtës në një fuqi të padrejtë që s'i shërben ligjit por oborrit familjar të Berishës. Berisha i grabiti dhe është shfaqur me gjithë arrogancën e tij në pronat publike duke i bërë ato prona familjare", tha Rama.


"Berisha nuk i hap kutitë sepse në kuti është fundi i pushtetit të Berishës që për interesa personale e ka zhytur vendin në krizë ekonominë. Rastet rrënqethëse vijnë nga bregdeti i vendit ku janë tjetërsuar pronat. Ato janë një dramë e jashtëzakonshme për mijëra familje shqiptare që kanë ndenjur 20 vjet me ankthin e kompensimit dhe tani iu thonë se kjo pronë s'është e juaja, por e oborrit familjar", vijoi Rama në mitingun e Elbasanit.


Ai është ndalur edhe tek një nga temat e ditës, shembja e tunelit të Kalimashit.
"Përpara pak javësh tuneli i Kalimashit u mbyll pa afat sot media lajmëroi për shembje në një pjesë të tij për shkak të dëmtimeve të rënda. Tani duhen nxjerrë miliona nga arka e shtetit për të riparuar dëmtimet në tunel dhe për të thelluar krimin ekonomik në një vepër madhore. Ndaj kërkojmë hapjen e kutive sepse aty është çlirimi i qytetareve nga korrupsioni".


"Por ne jemi të vendosur për të mos hyrë në Parlament dhe ju siguroj se mandatet e PS-së nuk digjen dhe nuk do të digjen sepse deputetët e PS-së i kanë ato mandate për të mbrojtur lirinë tuaj për ti dhënë fund zgjedhës së pushtetit familjar të Sali Berishës. 20 nëntori është një ditë e shënuar në këtë përpjekje historike. Më 20 nëntor është protesta e madhe mbarëkombëtare në Tiranë për të kërkuar të drejtat e gjithë shqiptarëve. Për të kërkuar drejtësinë që fshihet në kutitë e votimit", përfundoi Rama.