Galiani: Në Romë, me skuadër më të mirë

Sokol KONDI
11-03-2008





Rikuperimi i tri pikëve ndaj Fiorentinës në renditje, pas një prej ndeshjeve më të dobëta të sezonit, nuk e ka befasuar shumë Adriano Galianin. "Futbolli kështu është, një top që hyn në rrjetë, të ndryshon jetën", - kujton administratori i deleguar kuqezi. Fitorja në Empoli e sheh Milanin një pikë larg zonës Champions, por ka konfirmuar edhe formën e skuadrës që Ançelotit, që të shtunën në mbrëmje do të luajë ndaj Romës në "Olimpiko". "Kundër verdhekuqve, do të luajmë me një skuadër më të mirë. Do të riaftësojmë lojtarë si Jankulovski, Nesta, Gatuzo e Sedorf, - uron Galiani, që i pa rezervat të lodhen jo pak kundër të rinjve të Malezanit. - Por sprinti final ende nuk ka filluar për vendin e katërt, duke parë që kjo ishte një javë, ku ishim akoma të lodhur nga Championsi, por tani nis ritmi normal me një ndeshje në javë, me përjashtim të turit të mesjavës me Sampdorian. Vazhdoj të them që në Empoli ndodhi e kundërta e asaj që u pa me Arsenalin. Në një moment që nuk e meritonim, kaluam në epërsi, sikundër bëri dhe Arsenali, që edhe pse luajti shumë më mirë se në në të dyja ndeshjet, kur kaloi në epërsi, ndeshja po mbizotërohej nga ne. Por futbolli kështu." Mendimi i fundit është për Ronaldon, që pas periudhës së pushimit me operacionin në Paris, është gati të kthehet në Milano për fazën riaftësuese: "Kam biseduar, di që kthehet këto ditë. A është gati rinovimi i tij? Nuk e di, do të flasim me të, do të kemi kohë, por në fillim duhet të shërohet."
E ARDHMJA - "Strada facendo" (duke rrugëtuar). Klaudio Baljoni s'ka të bëjë, pasi e drejta e autorit kësaj here i takon Milanit, i cili paketoi tri pikët, i mori në shtëpi dhe tani sheh përpara. Pret të shohë se ç'do të ndodhë, pra nëse do të shkojë në Champions apo në Kupën UEFA, nëse do të kthehet apo jo loja, e cila ka ca që është zbehur, dhe nëse do të kthehet apo jo Andrij Shevçenko. Por edhe nëse do të luajë sërish apo jo Ronaldo, dje ai kreu vizitën e fundit të kontrollit në Paris dhe u kthye në Milano, ku do të vendosë se si do t'i zhvillojë muajt e fizioterapisë. "Strada facendo" është parulla që zgjedh kapiteni Maldini për të portretizuar të tashmen e Milanit dhe të ardhmen e tij: "Kalendari më i lehtë është një avantazh, nga i cili do të kishim hequr dorë me kënaqësi, por që mund të jetë i dobishëm në ndjekjen ndaj vendit të 4. Ndeshja në Empolit ishte më e vështira: tani duhet të kemi besim, edhe sepse angazhimi në UEFA mund ta kushtëzojë disi Fiorentinën. Të ardhmen time e konfirmoj se s'është e sigurt, se do të tërhiqem, dera është e hapur, por do të vendos gjatë rrugës."

OBJEKTIVI MINIMAL - Gjatë rrugës edhe Rikardo Kaka do të bëjë bilancin e sezonit, i cili hëpërhë, pavarësisht fitimit të Botërorit për Klube dhe Superkupës Europiane, nuk i duket i kënaqshëm: "Vendi i katërt ishte objektivi i tretë, pas Championsit dhe titullit, të cilin kemi shumë kohë që nuk e fitojmë: sezoni nuk është i shkëlqyer, por i mirë. Viti 2008 s'do të jetë si 2007-a, por është gjithsesi e rëndësishme ta arrijmë vendin e katërt. Ajo në Empoli ishte një situatë e vështirë, por që për fat të mirë e fituam ndeshjen. Tani e tutje mund të stërvitemi mirë dhe besoj se loja jonë do të jetë sërish bindëse. Unë po përmirësohem; në Empoli shënova një gol dhe dhashë një asist, si dhe dua të jem gjithnjë vendimtar".

skuadra me e mire ne Itali esht juventusi;se meqen nuk do fitonte kampionatin italian...